jab apna saaya hi dushman hai kya kiya jaae
yahi to zehn ki uljhan hai kya kiya jaae
hain jis ke haath men zarre bhi mah-o-anjum bhi
usi ke haath men daman hai kya kiya jaae
udaas baam pe mausam ne khol diin zulfen
kisi biyog men jogan hai kya kiya jaae
vo sham-e-lutf-o-tarab aur chandni sa badan
isi khumar men nagan hai kya kiya jaae
vo apni shokh adaon se lutta hai mujhe
bahut hasin ye rahzan hai kya kiya jaae
vafa-parast hai atish-fishan ka rakhvala
sanam-kade men barahman hai kya kiya jaae
fareb deta hai ‘alam’ pe raaj karta hai
adu ke haath men har fan hai kya kiya jaae
Leave a Reply