jaan yuun libas-e-jism ko nikli utaar kar
jaise koi sara.e men ik shab guzar kar
halat ne libas to mela kiya magar
kirdar phir bhi rakkha hai ham ne sanvar kar
me.aar aj-kal to baḌa.i ka hai yahi
apni har ek baat ko tu ishtihar kar
gar ho sake to de unhen ummid ki kiran
baiThe hon zindagani se apni jo haar kar
duniya bahut baḌi hai kahin kar talash-e-rizq
halat kuchh hon in pe na ab inhisar kar
ye bhi to hai ana ko kuchalne ka ek taur
nafrat rahi hai jis se usi ko tu pyaar kar
jo zaḳhm dushmanon se mile un ko tu na dekh
jo doston ne baḳhshe hain un ka shumar kar
ummid roz ek na.i le ke jagiye
nakamiyon ke bojh ko sar se utaar kar
har koi ansuon ki zaban janta nahin
ankhen kisi ke samne mat abshar kar
apne nahin to aur kisi ke liye bhi ji
‘ḳhalid’ ravish ik aisi bhi ab iḳhtiyar kar
Leave a Reply