Bashir Badr
hamara dil savere ka sunahra jaam ho jaae
charaghon ki tarah ankhen jalen jab shaam ho jaae
kabhi to asman se chand utre jaam ho jaae
tumhare naam ki ik khub-surat shaam ho jaae
ajab halat the yuun dil ka sauda ho gaya akhir
mohabbat ki haveli jis tarah nilam ho jaae
samundar ke safar men is tarah avaz de ham ko
havaen tez hon aur kashtiyon men shaam ho jaae
mujhe malum hai us ka thikana phir kahan hoga
parinda asman chhune men jab nakam ho jaae
ujale apni yadon ke hamare saath rahne do
na jaane kis gali men zindagi ki shaam ho jaae
Leave a Reply