Jaan Aise KHwabon Se Kis Tarah chhuDaun Main

jaan aise ḳhvabon se kis tarah chhuḌa.un main

shahr so gaya saara ab kise jaga.un main

pa.emal sabze par dekh kar gire patte

ab zamin se ḳhud ko kis tarah uTha.un main

in akeli raton men in akele raston par

kis ke saath aa.uun main kis ke saath ja.un main

ek hi si tanha.i ek hi sa sannaTa

dasht kya hai dil kya hai kya tujhe bata.un main

dekh kaise din aa.e dekh main na kahta tha

tu qarib bhi aa.e aur tujhe bula.un main

aaj sab men ghul-mil ja.un mujh ko kya ḳhabar kal tak

kis ko yaad aa.uun main kis ko bhuul ja.un main

kitne kaam duniya ne de diye mujhe ‘ja.afar’

ashk-e-gham gira.un main bar-e-gham uTha.un main