Ameer Raza Mazhari
isi mamure men kuchh aise hain sauda.i bhi
jin ke kaam aa na saki teri masiha.i bhi
shukr hai aap ko mere liye zahmat na hui
lijiye kaT ga.i meri shab-e-tanha.i bhi
baḌh saki jis se na angusht-ba-lab nadani
usi manzil men nazar aati hai dana.i bhi
allah allah re giran-jani-e-bimar-e-vafa
na-tavani bhi hai hairan tavana.i bhi
vo bhi tinka na mila haath baḌhaya tha jidhar
chhuT gaya haath se daman-e-shakeba.i bhi
ham yahin baiThe rahe hasrat-e-pa-bos liye
chuum kar parda-e-dar bad-e-saba aa.i bhi
sha.iri ik dil-e-marhum ka matam hi nahin
chahiye is men ‘raza’ fikr ki gahra.i bhi
Leave a Reply