kitni bulandiyon pe sar-e-dar aa.e hain
kisi marka men ahl-e-junun haar aa.e hain
ghabra uThe hain zulmat-e-shab se to bar-ha
naale hamare lab pe sharar-bar aa.e hain
ai qissa-go azal se jo biiti hai vo suna
kuchh log tere fan ke parastar aa.e hain
paa.i gulon se abla-pa.i ki jab na daad
divane hain ki su-e-lab-e-ḳhar aa.e hain
gham-ḳhvariyon ki tah men dabi si masarraten
yuun mere paas bhi mire gham-ḳhvar aa.e hain
pahunche hain jab bhi ḳhalvat-e-dil men to ai nadim
aksar ham apne aap se be-zar aa.e hain
us bazm men to mai ka kahin zikr tak na tha
aur ham vahan se be-ḳhud o sarshar aa.e hain
us ki gali men ham ne luTa di mata-e-jan
us ki gali se ham to subuksar aa.e hain
karte rahe hain fan ki parastish tamam umr
mahshar men kaise kaise gunahgar aa.e hain
‘jazbi’ jo ho sake to miri hairaton se puchh
kis tarah mere zehn men ash.ar aa.e hain
Leave a Reply