go kaThin hai tai karna umr ka safar tanha
lauT kar na dekhunga chal paḌa agar tanha
sach hai umr bhar kis ka kaun saath deta hai
gham bhi ho gaya ruḳhsat dil ko chhoḌ kar tanha
aadmi ko gumrahi le ga.i sitaron tak
rah ga.e bayaban men hazrat-e-ḳhizar tanha
hai to vaj.h-e-rusva.i meri hamrahi lekin
raston men ḳhatra hai jaoge kidhar tanha
ai ‘shu.ur’ is ghar men is bhare-pure ghar men
tujh sa zinda-dil tanha aur is qadar tanha
Leave a Reply