aur kya rah gaya hai hone ko
ek aansu nahin hai rone ko
khvab achchhe rahenge an-dekhe
khaak achchhi rahegi sone ko
tu kahin baith aur hukm chala
ham jo hain tera bojh dhone ko
chashm-e-nam chaar ashk aur idhar
daagh ik rah gaya hai dhone ko
baithne ko jagah nahin milti
kya karen odhne-bichhaune ko
ye mah o saal chand baaqi hain
aur kuchh bhi nahin hai khone ko
na-rasai ka ranj laae hain
tere dil men kahin samone ko
aaj ki raat jaag lo yaaro
vaqt phir hashr tak hai sone ko
yaad bhi teri mit gai dil se
aur kya rah gaya hai hone ko
Leave a Reply