Sarmad Sahbai
dasht men hai ek naqsh-e-rahguzar sab se alag
ham men hai shayad koi mahv-e-safar sab se alag
chalte chalte vo bhi aḳhir bhiiḌ men gum ho gaya
vo jo har surat men aata tha nazar sab se alag
sab ki apni manzilen thiin sab ke apne raste
ek avara phire ham dar-ba-dar sab se alag
hai rah-o-rasm-e-zamana parda-e-be-gangi
darmiyan rahta huun main sab ke magar sab se alag
de ke aadat ranj ki hota hai mujh par mehrban
us sitamgar ne ye sikha hai hunar sab se alag
shahr-e-kasrat men ajab ik rauzan-e-ḳhalvat khula
us ne jo dekha mujhe ik lamha bhar sab se alag
har koi shamil hua ‘sarmad’ julus-e-am men
munh uTha.e chal diya hai tu kidhar sab se alag
Leave a Reply