Ameer Raza Mazhari
idhar se bhi to hava-e-bahar guzri hai
kuchh ek baar nahin baar baar guzri hai
gila nahin ye faqat arz-e-hal hai ai dost
tire baghair bahut be-qarar guzri hai
vahi to meri hayat-e-safar ki punji hai
vo zindagi jo sar-e-rahguzar guzri hai
qalam liye hue socha kiye ki kya likhen
kuchh is tarah bhi shab-e-intizar guzri hai
bhula sakenge na us ko qafas men ai sayyad
vo do ghaḌi jo sar-e-shaḳh-sar guzri hai
kabhi kabhi to miri bar-mahal ḳhamoshi bhi
unhen fughan ki tarah nagavar guzri hai
huiin jo dil se mire bad-gumaniyan un ko
to sha.iri bhi miri nagavar guzri hai
ḳhizan men bhi na kisi ki ḳhuda kare guzre
vo jis tarah miri fasl-e-bahar guzri hai
ubhar ga.i hai kahin par ‘raza’ jo talḳhi-e-fikr
mire mizaj-e-ghazal par vo baar guzri hai
Leave a Reply