Moid Rahbar
ḳhud ko kabhi jo ḳhud se milana paḌa hamen
chehre ke paas a.ina laana paḌa hamen
tanha.iyon ka dard bhulane ke vaste
ḳhud apne ghar men shor machana paḌa hamen
muddat ke baad ho gaya jab un se samna
nakam hasraton ko jagana paḌa hamen
is dasht-e-ka.enat men jiine ke vaste
soz-e-gham-e-hayat bhulana paḌa hamen
ban jaa.e phir na ek tamasha ye soch kar
duniya se apna dard chhupana paḌa hamen
kuchh tirgi-pasand kal aa.e the is liye
basti ka har charagh bujhana paḌa hamen
suraj ka zulm aur baḌhega ye jab suna
angan men ek peḌ lagana paḌa hamen
aisa bhi vaqt alam-e-ghurbat men aa gaya
bachchon ko bhuke peT sulana paḌa hamen
‘rahbar’ hamare vaste manzil nahin chali
manzil ki samt chal ke ḳhud aana paḌa hamen
Leave a Reply