Hastimal Hasti
shishe ke muqaddar men badal kyuun nahin hota
in pattharon ki aankh men jal kyuun nahin hota
qudrat ke usulon men badal kyuun nahin hota
jo aaj hua hai vahi kal kyuun nahin hota
har jhiil men paani hai har ik jhiil men lahren
phir sab ke muqaddar men kanval kyuun nahin hota
jab us ne hi duniya ka ye divan racha hai
har aadmi pyari si ghazal kyuun nahin hota
har baar na milne ki qasam kha ke mile ham
apne hi iradon pe amal kyuun nahin hota
har gaanv men mumtaz janam kyuun nahin leti
har moḌ pe ik taj-mahal kyuun nahin hota
Leave a Reply