biite vaqt ka chehra DhunDhta rahta hai
dil pagal hai kya kya DhunDhta rahta hai
ḳhamoshi bhi ek sada hi hai jis ko
sunne vaala goya DhunDhta rahta hai
shabnam shabnam pighli pighli yaden hain
mera gham to sahra DhunDhta rahta hai
us ne apni manzil hasil kar li hai
phir kyuun ghar ka rasta DhunDhta rahta hai
dil sab se milta hai halke lahje men
sab men kuchh kuchh tujh sa DhunDhta rahta hai
bech diya gul-dan virasat ka us ne
bhaa.i mira ab gamla DhunDhta rahta hai
jeb men dil thaile men patthar le kar ‘arsh’
shahr koi divana DhunDhta rahta hai
Leave a Reply