Shamim Ravish
ruuh ko apni tah-e-dam nahin kar sakta
main kabhi sub.h se yuun shaam nahin kar sakta
umr-bhar saath to rah sakta huun tere lekin
apni ankhen main tire naam nahin kar sakta
tujh ko itna nahin ma.alum mire baare men
shart rakh kar main koi kaam nahin kar sakta
mujh pe har ik se mohabbat ki ye tohmat na laga
main ki is jazbe ko yuun aam nahin kar sakta
is qadar uljha hua rahta huun ḳhud se ki ‘ravish’
do ghaḌi ko bhi main aram nahin kar sakta
Leave a Reply