mohabbat koi numayan nishan nahin
jis se laash ki shanakht men asani ho
jab tak tum mohabbat ko daryaft kar sako
vo van ravana ho chuki hogi
jo un lashon ko le jaati hai
jin par kisi ka daava nahin
shayad vo raste men
tumhari savari ke barabar se guzri ho
ya shayad tum us raste se nahin aaiin
jis se
mohabbat men maare jaane vaale le jaae jaate hain
shayad vo vaqt
jis men mohabbat ko daryaft kiya ja sakta
tum ne kisi jabri mashq ko de diya
patthar ki sil par litaya hua vaqt
aur intizar ki akhiri had tak khinchi hui
safed chadar
tumhari mashq khatm hone se pahle tabdil ho gae
shayad tumhare paas
ittifaqiya rukhsat ke liye koi din
aur mohabbat ki shanakht ke liye
koi khvab nahin tha
us vaqt tak jab tum
mohabbat ko apne hathon se chhu kar dekh saktin
vo van ravana ho chuki hogi
jo un khvabon ko le jaati hai
jin par kisi ko daava nahin
Leave a Reply