Poet
yaas hi se kabhi guzar pyare
muntazir hain dil-o-nazar pyare
phuul khilte ga.e mohabbat ke
tu ne dekha jidhar-jidhar pyare
gauhar-e-dil ki qadr kya karte
ye hasin log kam-nazar pyare
do qadam saath kya chale ham tum
baat pahunchi nagar-nagar pyare
main to ḳhud hi fareb-ḳhurda huun
tu miri justuju na kar pyare
ban ga.e log sahab-e-daulat
jins-e-iman ko bech kar pyare
yuun to ahbab aur bhi hain bahut
tujh se baḌh kar nahin magar pyare
tang-dasti men dekhna ‘nusrat’
bik na jaa.e kahin hunar pyare
Leave a Reply