‘alam’ jivan khel-tamasha dana.i nadani hai
tab tak zinda rahte hain ham jab tak ik hairani hai
aag hava aur miTTi paani mil kar kaise rahte hain
dekh ke ḳhud ko hairan huun main jaise ḳhvab kahani hai
avazon ka jangal bhi hai sannaTon ka sahra bhi
ek taraf abadi mujh men ek taraf virani hai
is manzar ko aḳhir kyuun main pahron takta rahta huun
uupar sakit chaTTanen hain tah men bahta paani hai
mere bachcho is ḳhitte men pyaar ki ganga bahti thi
dekho is tasvir ko dekho ye tasvir purani hai
‘alam’ mujh ko bimari hai niind men chalte rahne ki
raton men bhi kab rukta hai mujh men jo sailani hai
Leave a Reply