jafaon ki numa.ish hai kisi se kuchh nahin bolen
sitamgar ki sata.ish hai kisi se kuchh nahin bolen
mujhe tanha.i paḌhni hai magar ḳhamosh lahje men
yahi mahfil ki ḳhvahish hai kisi se kuchh nahin bolen
mire afkar pe bole baḌi tahzib se zahid
muqaddar azma.ish hai kisi se kuchh nahin bolen
ye jo behal sa manzar ye jo bimar se ham tum
siyasat ki navazish hai kisi se kuchh nahin bolen
udhar hai jaam hathon men labon pe muskurahaT hai
udhar jab ḳhuun ki barish hai kisi se kuchh nahin bolen
mulazim banna tha kis ko mulazim ban gaya koi
hunar zer-e-sifarish hai kisi se kuchh nahin bolen
zaban azad hai jo bhi vahi to zinda hai lekin
zaban pe kaisi bandish hai kisi se kuchh nahin bolen
adavat ki yahan ‘az.har’ jo ik chingari uTThi thi
vo banti jaati atish hai kisi se kuchh nahin bolen
Leave a Reply