Poet
niind ki ankh-micholi se maza lete hain
phenk dete hain kitabon ko uTha lete hain
bhula-bhaTka sa musafir koi shayad mil jaa.e
do qadam chalte hain avaz laga lete hain
abr ke TukḌon men ḳhurshid ghira ho jaise
kahin kahte hain kahin baat chhupa lete hain
andhiyan tez chalengi to andhera hoga
ḳhud bhi aise men charaghon ko bujha lete hain
varaq-e-zist ko rakhna bhi hai saada ‘mahshar’
hal-e-gham likhte hain aur ashk baha lete hain
Leave a Reply