Josh-E-Girya Ye Dam-E-Rukhsat-E-Yar Aae Nazar

josh-e-girya ye dam-e-rukhsat-e-yar aae nazar

abr-e-joshan ka bandha jaise ki taar aae nazar

rang-e-gulzar jahan garche hazar aae nazar

chain par dil ko kahan taaki na yaar aae nazar

apna jab ku-e-tasavvur men guzar aae nazar

jis taraf dekhen udhar surat-e-yar aae nazar

huun main kis ghairat-e-gulzar ka zakhmi ki mire

har bun-e-mu pe gul-e-zakhm hazar aae nazar

bin padhe phaad ke khat rakh de jo vo rauzan men

juun qalam siina mira kyuun na figar aae nazar

ham-sukhan jis se na ho sakiye phir us shokh se aah!

aur kuchh baat ka kab dar-o-madar aae nazar

ho jahan jumbish-e-lab ka bhi na yaara ai vaae

munh kahan ye ki jo vaan bos-o-kanar aae nazar

ham dil-afrokhta vaan juun sharar-e-sang hain aah

na jahan paik-e-saba ka bhi guzar aae nazar

sar-bulandi jinhen de charkh na de chain unhen

ki ba-gardish mah-o-khur lail-o-nahar aae nazar

jab ki har roz katin vaade pe ghadiyan ginte

kyuun na har din hamen phir roz-e-shumar aae nazar

us ke mahram pe bhabuka si jo dekhun chidiya

kyuun na juun tair-e-simab qarar aae nazar

ho ba-sad-rang shagufta lab-e-dariya pe vo baagh

har ravish jis men ki bas lutf-e-hazar aae nazar

chaar su naghma-sarai men hon murghan-e-chaman

shakh-dar-shakh ajaib gul-o-bar aae nazar

mauj-e-dariya idhar atkheli ki chalen dikhlae

aur udhar raqs-kunan bad-e-bahar aae nazar

hove atraf se ghanghor ghata ghir aai

kaund bijli ki ho aur padti phuvar aae nazar

ik taraf mor munDeron pe karen kya kya shor

ik taraf abr men baglon ki qatar aae nazar

gardish-e-jam ho juun gardish-e-chashman-e-butan

haath men mutrib-e-sar-khush ke sitar aae nazar

lab-ba-lab sina-ba-sina jise chahen vo ho

gulshan-e-zist ki tab ham ko bahar aae nazar

ashiqana ghazal ab padh koi ‘jurat’ tah-dar

maani-e-taza bhi ta yaron ko yaar aae nazar

Leave a Comment