Poet
mithi hai aisi baat us ki
laundi hai ik nabat us ki
samjha na main ek baat us ki
mujh par kya kaenat us ki
aalam hai be-sabat ai dil
ik zaat ko hai sabat us ki
mah us ka hai aftab us ka
din us ka hai aur raat us ki
kis munh se karun main vasf us ka
hai aql se duur zaat us ki
mimber pe jo bak raha hai vaaiz
kab sunta huun khair baat us ki
hai daulat-e-husn paas tere
deta nahin kyuun zakat us ki
hai jo ki shahid tegh-e-taslim
hai misl-e-khizar hayat us ki
dam de ke na naqd-e-dil ko le-le
chal jaae kahin na ghaat us ki
jo dil ki hai gharq bahr-e-duniya
kyunkar hogi najat us ki
dil jaata hai su-e-ku-e-qatil
khaliq rakhe hayat us ki
dam de ke le aaya yaar ko dil
kya rah gai aaj baat us ki
tanha nahin ‘muntahi’ kisi ja
taqdir hai us ke saath us ki
Leave a Reply