Saleem Fauz
agar ham chhoḌ den arz-e-hunar ḳhamosh ho jaa.en
hamare saath ye divar-o-dar ḳhamosh ho jaa.en
isi baa.is to honTon par saval ab tak nahin aaya
kahin aisa na ho ye charagar ḳhamosh ho jaa.en
tilism-e-be-yaqini har qadam par gher leta hai
na jaane dhaḌkanen kis moḌ par ḳhamosh ho jaa.en
agar be-chehra a.ine ko chehra de nahin sakte
to saare shahr ke a.ina-gar ḳhamosh ho jaa.en
zamin se be-vafa.i mat karo varna ye mumkin hai
ki shaḳhen kaT rahi hon aur shajar ḳhamosh ho jaa.en
Leave a Reply