rishte bane hue hain sabhi ke sabhi ke saath
vabastagi nahin hai kisi ki kisi ke saath
TuuTa hai ik sitara abhi asman se
phir bevafa.i ki hai kisi ne kisi ke saath
raushan gharon men baanT di phir raushni tamam
insaf ye hua hai miri tirgi ke saath
itni tahen khuli hain ki khulti chali ga.iin
ik baat us ne ki thi baḌi sadgi ke saath
us ki talash us ki talab us ka zikr-e-ḳhair
dar-parda bandagi hai miri sha.iri ke saath
Leave a Reply