Haidar Ali Aatish
divangi ne kya kya aalam dikha diye hain
pariyon ne khidkiyon ke parde utha diye hain
allah-re farogh us rukhsar-e-atishin ka
shamon ke rang misl-e-kafur uda diye hain
atish-nafs hava hai gulzar ki hamare
bijli giri hai ghunche jab muskura diye hain
sau baar gul ko us ne talvon tale mala hai
katva ke sarv shamshad akasr jala diye hain
insan-e-khub-ru se baaqi rahe tafavut
is vaste pari ko do par laga diye hain
abru-e-kaj se khun-e-ushshaq kya ajab hai
talvar ne nishan-e-lashkar mita diye hain
kis kis ko khuub kahiye allah ne buton ko
kya gosh o chashm kya lab kya dast-o-pa diye hain
be-yar baam par jo vahshat men chadh gaya huun
parnale rote rote main ne baha diye hain
vasf-e-kaman-e-abru jo kijiye so kam hai
be-tir bismilon ke tuude laga diye hain
roya huun yaad kar ke main teri tund-khui
sarsar ne jab charagh-e-raushan bujha diye hain
soz-e-dil-o-jigar ki shiddat phir aj-kal hai
phir pahluon ke takiye mashal bana diye hain
shamon ko tu ne dil se parvanon ke utara
ankhon se bulbulon ki gulshan gira diye hain
vo bada-kash huun meri avaz-e-pa ko sun kar
shishon ne sar huzur-e-saghar jhuka diye hain
ashkon se khana-e-tan ‘atish’ kharab hoga
qasr-e-sipihr-e-rifat baran ne dha diye hain
Leave a Reply