us ne ḳhud phone pe ye mujh se kaha achchha tha
dagh-e-bosa vo jo kandhe pe mila achchha tha
pyaas ke haq men mire honT dua karte the
pyaas ki chaah men ab jo bhi mila achchha tha
niind bal khati hui aa.i thi nagin ki tarah
kaaT bhi leti agar vo to baḌa achchha tha
yuun to kitne hi ḳhuda aa.e mire raste men
main ne ḳhud hi jo banaya tha ḳhuda achchha tha
vo jo nuqsan ki manind mujhe lagta hai
sach to ye hai ki vahi ek nafa achchha tha
dil ki tarik si galiyon men tumhari aahaT
aur aahaT se jo ik phuul khila achchha tha
jism ko yaad kiya karti hai ab ruuh miri
aur kahti hai ki vo baagh ama achchha tha
log kahte hain ki vo shaḳhs bura tha lekin
dil to kahta hai ki vo shaḳhs baḌa achchha tha
Leave a Reply