Girhen Khulti Nahin

kaisi girhon men tar-e-nafas hai ye uljha hua

saari peshaniyon par lakiron ka phaila hua jaal hai

is men jakdi gai

muskurahat kahin

dhajjiyan chaar atraf udne lagin

kis ka malbus hai

har nagar har gali

khauf hi khauf hai

agli baai hai kis ki

kisi ko pata tak nahin

munh chhupae hue

taane, dushnam sahte hain jo ajnabi

apne hi to nahin

char-su hai ragen katti zamhariri hua

sard-mehri ke barfab mausam men

thithure hue hont hain

aur zaban ki ragen bhi tashannuj se khichne lagin

kaisa aseb-e-vahshat hai

kyuun sar se talta nahin

ayaten bhi hamen bhuul jaane lagin

jibrail-e-amin

suratunnas aur al-falaq padh ke phunko

dilon men

aqidon ki girhen padi hain

ye ham se to khulti nahin!

Leave a Comment