ishq ko ḳhun-e-jigar ki hai talab kahte hain
zaḳhm khane ko vafaon ka adab kahte hain
husn ki dhuup men nikhra hua phulon sa badan
dil ke luT jaane ka is ko hi sabab kahte hain
ḳhaak malta hai falak aa ke mire qadmon ki
ḳhaksari ko bulandi ka laqab kahte hain
vo bhi lahra ke har ik dard suna karti hai
qaid ka vaqi.a zanjir se jab kahte hain
tum ye maano ki na maano hai tumhari marzi
ishq ko daan sahi jiine ko Dhab kahte hain
dil men tufan jo chhupa.e ho chhupa.e rakkho
saara afsana larazte hue lab kahte hain
tum divane ho ye sach hai ise taslim karo
ham nahin kahte faqat shahr men sab kahte hain
in ko dekhun to inhen meri nazar lag jaa.e
aisa hota hai kahin aap ghazab kahte hain
dil jo rota hai use gaate hue nikle ‘nadim’
log is dard-e-mohabbat ko adab kahte hain
Leave a Reply