Raunaq Raza
dekh ufuq ke pile-pan men duur vo manzar Duub gaya
jaise kisi bimar ke ruḳh par rang ubhar kar Duub gaya
jhuTi aas ke pankh laga kar saat samundar uḌ aaya
tere qurb ki ḳhushbu pa kar main sahil par Duub gaya
yaad ki ai saili divaro ab ke aisa lagta hai
haal ki tughyani men jaise maazi ka ghar Duub gaya
vo to apne qad se ziyada sar-afaraz-e-bazm hua
main gumnam zamana apni zaat ke andar Duub gaya
us ke badan ke simin-pan ka ek tasavvur tha ki achanak
lams ne baḌh kar Thokar khaa.i chand chamak kar Duub gaya
Leave a Reply