tirgi men ek pal ka hi sahara kar gaya
vo charaghon ki tarah shab men ujala kar gaya
justuju ḳhvahish talab hasrat tamanna aarzu
jaate jaate vo sabhi jazbon ko ThanDa kar gaya
fasla kuchh bhi nahin tha jism-o-jan ke darmiyan
vo magar us men bhi thoḌa fasla sa kar gaya
ye bahut achchha kiya ki pher li us ne nazar
kam se kam mere yaqin ko aur pakka kar gaya
abr ka vo ek TukḌa tha bahut chhoTa magar
chilchilati dhuup men kuchh der saaya kar gaya
is qadar dushvariyon ka ye baḌa ehsan hai
hadson ka silsila iman puḳhta kar gaya
ḳhvab ankhon ko dikha kar saare manzar le liye
mujh ko bina.i ata kar ke vo andha kar gaya
main use ilzam duun ‘mashkur’ ye mumkin nahin
vo mere alfaz le kar mujh ko gunga kar gaya
Leave a Reply