insha-allah-khan-insha

Hazrat-E-Ishq Idhar Kije Karam Ya Mabud

hazrat-e-ishq idhar kiije karam ya maabud

bal-gopal hain yaan aap ke ham ya maabud

banda-khana men aji laiye tashrif-e-sharif

aa ke rakh diije in aankhon pe qadam ya maabud

nafi isbat ki shaghil jo qalandar hain so vo

apni gardan ko nahin karte hain kham ya maabud

apne daata ki haqiqat ke hain jalva tum men

lama-e-nur-e-tajalli ki qasam ya maabud

jald phatkariye sabze ke nashe ko koda

khinchiye aur koi sulfe ka dam ya maabud

aap hi aap hain vo aap ne sach farmaya

yuun bhi kuchh dhoke se the naam ko ham ya maabud

varna ye ariyatan hai jo vajud apna so

guzaran vo to hai juun mauja-e-yam ya maabud

vaqai bolne se apne lada baithe jo aankh

kyuun khudi se na kare pher vo rum ya maabud

aankh ko kahte arab ain hain so ain agar

dam par aa jaae to ho ain-e-adam ya maabud

raat tiryak nasha ne to ulat Daala vaah

koi ghola to vo tha kasa-e-sam ya maabud

sidra tak aan to pahuncha huun dili qasd hai ye

ki badhun aur bhi do-char qadam ya maabud

chaar zaanu ho ab ‘insha’ bhi zamin se uncha

yak va jab rahne laga saada ki dam ya maabud

More Poems

Leave a Comment