Jage Jo KHwab-E-Gham Se Phir Nind Hi Na Aai

Poet

jaage jo ḳhvab-e-gham se phir niind hi na aa.i

dahshat ke zer-o-bam se phir niind hi na aa.i

malum hi nahin kuchh ham kaise so ga.e the

Dar kar ruḳh-e-sitam se phir niind hi na aa.i

taron se rabte kuchh qaa.em rahe hama-shab

is shaghl-e-mughtanam se phir niind hi na aa.i

gunji sukut-e-shab men avaz jaane kis ki

ham ko to ḳhauf-e-gham se phir niind hi na aa.i

aa.i jo yaad ‘az.har’ shab ko jafa-e-yaran

chashm-e-vafa ke nam se phir niind hi na aa.i