ishrat-afreen

Usne Hamd Likkhi Hai

is qadar hasin chehra

is qadar hasin ankhen

ye gulab se rukhsar

pal men tamtama utthen

pal men jagmaga utthen

pankhudi se nazuk lab

aap hi bisoren aur

aap muskura utthen

mujh ko yaad aata hai

jab tumhari kilkari

gunjti thi kamron men

jab tumhari gul-kari

phailti thi bistar par

shab ko jab jagate the

din ko jab thakate the

aisi hukmarani par

meri jaan jalti thi

aur aise lamhe men

tum hansi udate the

tum hansi udate the

qahqahe lagate the

kis ne ye sikhae sab

naaz aur ada tum ko

tum to saada kaghaz the

tum ko main ne jab paaya

tum ko main ne jab dekha

aur jis ghadi chuma

kya ajiib lamha tha

tum to ankhen munde the

aur jab khulin ankhen

hairati tha aina

munh taka hi karta tha

bas khamosh jis-tis ka

phir jo lab hue goya

kuchh yaqin na aata tha

sab karishma-sazi hai

ek andhe kiide ki

ya zara si mehnat hai

is bhali kumharan ki

jis ke band aave men

kuchh khabar nahin kya hai

aag hai ki paani hai

phuul hai ki chehra hai

haan suna ye tha main ne

arsh se farishta ik

aa ke batn-e-madar men

Dhalta hai khadd-o-khal

nanhe nanhe aaza par

naqsh se banata hai

us hasin saaat men

jis ko jitni fursat ho

jaisi istitaat ho

vo hunar dikhata hai

so yaqin hai mera

jis aziim saaat men

mehrban farishte ne

tum ko mujh men Dhala hai

us baligh saaat men

us ne shairi ki hai

us ne hamd likkhi hai

More Poems

Leave a Comment