Idris Babar
matl.a ghazal ka ghair zaruri kya kyuun kab ka hissa hai
zindagi chokleT cake hai thoḌa thoḌa sab ka hissa hai
ab jo bar men tanha piita huun coffē ke naam pe zahr
us ki talḳh si shirini men us ke lab ka hissa hai
lok kahaniyon men ma-ba.ad-e-jadid ki pesh-amad jaise
fiction ki re-cell value men maz.hab ka hissa hai
ke-pi-ke afghanistan hai aur balochistan iran
sindh hai chiin men aur pyara punjab arab ka hissa hai
sohni ya sohne se pahle haq hai ghaḌe par paani ka
kab se ghaḌi men jab aur tab se zyada ab ka hissa hai
maana hijr ki raat hai ye par kitni ḳhushi ki baat hai ye
gham ki rim-rim-jhim ki hamdam bazm-e-tarab ka hissa hai
cab chalane vaale daaji tab chalane vaala saaji
vo jo adab ka hissa the to ye bhi adab ka hissa hai
tai hua nazm hi mustaqbil hai pan-sau bil hai bha.i pyaro
aankh na maaro ghazal hamare hasab-nasab ka hissa hai
ik din jab buḌhe painter ke paas sharab ke paise nahin the
chhat par ye ghanghor ghaTa tab se is pub ka hissa hai
sex jo pahle saḳhtiyati roz-o-shab ka hissa thi
ab maba.ad-e-saḳhtiyati roz-o-shab ka hissa hai
qafiya bahr radif vaghaira jaise harif zarif vaghaira
in ko ThanDa soDa pilao bhaa.i ye kab ka qissa hai
Leave a Reply