Kunwar Bechain
ankhon men jo hamari ye jalon ke daagh hain
ye to hamare apne ḳhayalon ke daagh hain
meri hatheliyon pe jo mehndi se rach ga.e
ye ansuon men bhige rumalon ke daagh hain
bahar nikal ke jism se ja.un to kis tarah
sankal kahin kahin pe ye talon ke daagh hain
tum jin ko kah rahe ho mire qadmon ke nishan
vo sab to mere paanv ke chhalon ke daagh hain
kajal men ghul ke aur ziyada nikhar ga.e
ashkon ko ye na kahna ḳhayalon ke daagh hain
hal hote hote us ki natije pe aa ga.e
jitne javab hain vo savalon ke daagh hain
aate hi mere paas jo akasr chhalak paḌe
honTon pe mere aise hi pyalon ke daagh hain
aise bhi log hain jo sitaron ko dekh kar
kahte milen hain ye to ujalon ke daagh hain
jo mujh men dekhte hain mire bhi hain ai ‘kunvar’
kuchh un men mujh ko dekhne valon ke daagh hain
Leave a Reply