ab vo sauda nahin divanon men
ḳhaak uḌti hai bayabanon men
gham-e-dauran ko gila hai mujh se
tu hi tu hai mire afsanon men
dil-e-nadan tiri halat kya hai
tu na apnon men na beganon men
bujh ga.i sham.a sahar se pahle
aag jalti rahi parvanon men
dil ne chhoḌa na umidon ka ḳhayal
phuul khilte rahe viranon men
‘saif’ pahlu men ye aahaT gham ki
kaun rota hai bayabanon men
Leave a Reply