ye dil mira mire pahlu se anqarib chala
shikast kha ke ghamon se mira raqib chala
jab un ki bazm se uTh kar koi gharib chala
faza.en chiḳh uThin husn ka naqib chala
vo phir sameT ke banhon men ka.enat ka rang
gale surahi se mil kar mira habib chala
jahan jahan mutasadim hui junun se ḳhirad
baḌi ada se vahan ḳhama-e-adib chala
chhalakne vaala hai shayad miri hayat ka jaam
ye laḌkhaḌata hua kyon mira tabib chala
masa.il-e-gham-e-hasti ko aur uljhane
vo ‘hosh’ janib-e-manzil koi ḳhatib chala
Leave a Reply