Poet
qurb hai vasl mayassar nahin hone paata
kab se ik qatra samundar nahin hone paata
allah allah ye sanna.i-e-naqqash-e-azal
ek bhi naqsh mukarrar nahin hone paata
apne qadmon se kuchal deta hai saaya mera
jo mire qad ke barabar nahin hone paata
ab to nakam tamannaon ke matam ke liye
ek lamha bhi mayassar nahin hone paata
itna idrak hai apne qad-o-qamat ka mujhe
main kabhi jaame se bahar nahin hone paata
mujh se sarzad jo hua hai vo gunah hai ki savab
mujh ko mahsus bhi aksar nahin hone paata
Leave a Reply