dekha jo kuchh jahan men koi dam ye sab nahin
Tuk aankh mundte hi tum aur ham ye sab nahin
thoḌi si ziist hai jo ḳhushi se nibhe to ḳhair
varna nishat-o-ḳhurrami-o-gham ye sab nahin
bagh-o-bahar-o-josh gul-o-ḳhanda-e-subuh
saut-e-hazar-o-girya-e-shabnam ye sab nahin
duniya-o-din dida-e-dil sabr aur qarar
tu hi agar nahin to ik aalam ye sab nahin
kis kaam ke hain be-asari se agarche hain
ah-o-fughan-o-dida-e-pur-nam ye sab nahin
be-ishq jitni ḳhalq hai insan ki shakl men
nazron men ahl-e-did ke aadam ye sab nahin
zaḳhm-e-nihan-e-hijr ko be-vasl ai ‘muhib’
ho sud-mand baḳhiya-o-marham ye sab nahin
Leave a Reply