Kya Aag Sab Se Achchhi Kharidar Hai

Afzal Ahmad Syed

lakdi ke bane hue aadmi

paani men nahin dubte

aur divaron se tange ja sakte hain

shayad unhen yaad hota hai

ki aara kya hai

aur darakht kise kahte hain

har darakht men lakdi ke aadmi nahin hote

jis tarah har zamin ke tukde men koi kar-amad chiiz nahin hoti

jis darakht men lakdi ke aadmi

ya lakdi ki mez

ya kursi

ya palang nahin hota

aara banane vaale use aag ke haath bech dete hain

aag sab se achchhi kharidar hai

vo apna jism muavze men de deti hai

magar

aag ke haath giili lakdi nahin bechni chahiye

giili lakdi dhuup ke haath bechni chahiye

chahe dhuup ke paas dene ko kuchh na ho

lakdi ke bane hue aadmi ko dhuup se mohabbat karni chahiye

dhuup use sidha khada hona sikhati hai

main jis aare se kaata gaya

vo maqnatis ka tha

use lakdi ke bane hue aadmi chala rahe the

ye aadmi darakht ki shakhon se banae gae the

jab ki main darakht ke tane se bana

main har kamzor aag ko apni taraf khinch sakta tha

magar ek baar

ek jahannam mujh se khinch gaya

lakdi ke bane hue aadmi

paani men bahte hue

divaron par tange hue

aur qataron men khade hue achchhe lagte hain

unhen kisi aag ko apni taraf nahin khinchna chahiye

aag jo ye bhi nahin puchhti

ki tum lakdi ke aadmi ho

ya mez

ya kursi

ya diya-salai