Zindagi Khinch Gai Mujhse Tere Abru Ki Tarah

Muzaffar Warsi

zindagi khinch ga.i mujh se tire abru ki tarah

apne hi ḳhuun ka pyasa huun lab-e-ju ki tarah

vo sitara jo mire naam se mansub hua

dida-e-shab men hai ik aḳhiri aansu ki tarah

sho.ala-e-soz-e-darun sard hua jaata hai

koi samjha.e saba ko ki chale lu ki tarah

koi divana uThe ḳhaak uḌane ke liye

aaj bhi dasht hain phaile hue baazu ki tarah

is bhare shahar men karta huun hava se baten

paanv paḌta hai zamin par mira aahu ki tarah

shabnami haath baḌha.un ki khule darvaza

bin khile phuul ke zindan men huun ḳhushbu ki tarah

chahte hain jo ‘muzaffar’ gham-e-hasti se farar

baiTh jaa.en vo gaḌha khod ke sadhu ki tarah