Abdullah Kamal
bulandiyon ke dhundalke men tha khuda sa laga
jo main qarib se guzra to vo shanasa laga
na koi jism tha us ka na koi chehra magar
jihat jihat se ubharti hui sada sa laga
aqab men chhodta aaya shikastagi ka ghubar
ki sang-e-mil bhi mujh ko ik aaina sa laga
bahut nasheb-o-faraz us ke tai kiye main ne
vo sar se paanv talak ek rasta sa laga
yahi kaha tha ki tum sab badalte chehre ho
har ek shakhs mujhe phir khafa khafa sa laga
sada-e-amad-o-shud bais-e-safar thi ‘kamal’
nafas nafas mujhe apne lahu ka pyasa laga
Leave a Reply