tum se ik din kahin milenge ham
ḳharch ḳhud ko tabhi karenge ham
ishq! tujh ko ḳhabar bhi hai? ab ke
tere sahil se ja lagenge ham
kis ne raste men ye umiid rakhi
is se Takra ke gir paḌenge ham
asmanon men ghar nahin hote
mar ga.e to kahan rahenge ham
dhuup nikli hai teri baton ki
aaj chhat par paḌe rahenge ham
jo bhi kahna hai us ko kahna hai
us ke kahne pe kya kahenge ham
rok lenge mujhe tire aansu
aise paani pe kya chalenge ham
vo sunegi jo sunna chahegi
jo bhi kahna hai vo kahenge ham
Leave a Reply