nahin hal-e-dehli sunane ke qabil
ye qissa hai aansu bahane ke qabil
ujaḌe hain vo qasr ek ek is ke
jo the dekhne aur dikhane ke qabil
na aa.i ḳhush-abadi un ki falak ko
na the varna vo to miTane ke qabil
na paaya koi aur un ke siva kya
falak kya vahi the satane ke qabil
kiya aah barbad chun chun ke un ko
na the jo ki barbad jaane ke qabil
milaya jinhen ḳhaak men tu ne vo to
na the ḳhaak men yuun milane ke qabil
nahin ghus lagane ko chiḌiya talak vo
jahan jam.a the ik zamane ke qabil
sitam sa sitam tu ne Dhaya hai zalim
nahin baat ye munh pe laane ke qabil
unhen ḳhak-e-zillat pe paTka hai the vo
jo ankhon ke uupar biThane ke qabil
kahen hain sab ahbab dehli ko chaliye
rahi hai kahan ab vo jaane ke qabil
jise dekh kahte the sayyah-e-alam
ye hai ja-e-aram paane ke qabil
use dekh bulbul bhi kahti hai ye ja
nahin ashiyan ab banane ke qabil
suna jis ne ye haal afsos khaya
ye hai haal afsos khane ke qabil
ilahi basa phir tu apne karam se
use kyunki hai vo basane ke qabil
dikha.e hain afsos vo dil falak ne
na the ‘aish’ jo dil dikhane ke qabil
Leave a Reply