chhoḌ kar behal mujh ko apne begane ga.e
gardish-e-ayyam men sab log pahchane ga.e
jaane kis ki bad-nazar ne hashr barpa kar diya
munis-o-gham-ḳhvar sab dushman men gardane ga.e
koi bhi tadbir apni kaam ab aati nahin
meri aql-o-faham ke mash.hur afsane ga.e
bhuuk aur iflas ki suuli chaḌha kar qaum ko
rahnuma-e-vaqt ab parcham ko lahrane ga.e
khinch kar aksar gareban zarf ne roka hamen
jab kisi kamzor par ham zor dikhlane ga.e
hosh vaalo ko ḳhirad-mandi ne buzdil kar diya
aur mushkil ma.arkon par sirf divane ga.e
kis men dekhun aks sachcha.i ka ab main kya karun
aa.ine bhi jhuuT ke zumre men gardane ga.e
mil gaya ‘maqsud’ mujh ko ho ga.i taaza ghazal
fikr ke parde men jab alfaz lahrane ga.e
Leave a Reply