tire lab-bin hai dil men shola-zan mul jis ko kahte hain
nashe ki maut ki hichki hai qulqul jis ko kahte hain
jo puchhe ittihad-e-husn-o-ishq us ko nazar aave
ki nikla baiza-e-ghuncha se bulbul jis ko kahte hain
ai maali ḳharij ahangi na kar saz-e-mohabbat men
dil-e-bulbul hai TuuTa ḳhuun hua gul jis ko kahte hain
guzarne ka sabab hai zindagi ke aab se piiri
qadam ḳham hai muhit-e-umr ka pul jis ko kahte hain
baja hote hain ‘uzlat’ dil kabab in ishq-bazon ke
dhuan hai husn ki atish ka kakul jis ko kahte hain
Leave a Reply