Shahzad Anjum Burhani
kaun tha jo gunge lafzon ko ma.ani de gaya
barf ki jhilon ko andaz-e-ravani de gaya
ek jhonka tha mire dil ke ḳharab-abad men
nangi divaron ko tasviren purani de gaya
dastanon ka koi kirdar hai ye zindagi
jo bhi aaya vo hamen taaza kahani de gaya
main ana ke gumbad-e-dilkash men Thahra bhi na tha
koi chupke se sada-e-lan-tarani de gaya
TuTta kaise tilism-e-qaid-o-band-e-harf-o-lafz
vo ishara nusḳha-e-jadu-bayani de gaya
Leave a Reply