Ye Ibtida Hai Abhi Bab-E-iKHtitam Kahan

ye ibtidā hai abhī bāb-e-iḳhtitām kahāñ

lahū tarang kā qissa huā tamām kahāñ

likhī hai ḳhuun se ham ne hikāyat-e-hastī

magar kitāb meñ hogā hamārā naam kahāñ

hamārā naam na pūchho na kuchh patā pūchho

hamārī sub.h kahāñ hai hamārī shaam kahāñ

hameñ to kuchh bhī nahīñ hai ḳhabar ki ab ke ham

agar uTheñge yahāñ se to phir qayām kahāñ

matā-e-hosh to ham mai-kade meñ kho aa.e

chalā hai le ke hameñ ab surūr-e-jām kahāñ

Leave a Comment