Shams Fareedi
ye ibtida hai abhi bab-e-iḳhtitam kahan
lahu tarang ka qissa hua tamam kahan
likhi hai ḳhuun se ham ne hikayat-e-hasti
magar kitab men hoga hamara naam kahan
hamara naam na puchho na kuchh pata puchho
hamari sub.h kahan hai hamari shaam kahan
hamen to kuchh bhi nahin hai ḳhabar ki ab ke ham
agar uThenge yahan se to phir qayam kahan
mata-e-hosh to ham mai-kade men kho aa.e
chala hai le ke hamen ab surur-e-jam kahan
Leave a Reply