nashat-e-sahra-navardi ka haal bolta hai
hamara shauq hamin ko niDhal bolta hai
uruj-e-dilbari hasrat se dekhne vaale
vo sun jo silsila-e-pa.emal bolta hai
ye kya sitam hai ki ab us ka samna hoga
jo lab hila.e bina bhi kamal bolta hai
bhanvar ko ek kinara samajh raha huun main
kisi ke hone ka kya ehtimal bolta hai
zamane bhar ko main dil se nikal deta huun
zamana jab tujhe dil se nikal bolta hai
haqiqi ankhon se dekha gaya hai ye manzar
mire sukut se tera ḳhayal bolta hai
abhi na dekhenge ham aane vaale kal ki taraf
abhi to guzre zamanon ka haal bolta hai
Leave a Reply