Abdul Mannan Tarzi
ghazal men fan ka jauhar jab dikhate hain ghazal vaale
zamin ko asman jaisa banate hain ghazal vaale
badal dete hain kharon ki khalish gul ki nazakat se
zaban shabnam ki shoalon ko sikhate hain ghazal vaale
kabhi pahle ghazal un ki kabhi khud peshtar is se
kisi ke dida-o-dil men samate hain ghazal vaale
agar aahon se apni koi misraa gad.h bhi lete hain
to ashkon se girah us par lagate hain ghazal vaale
vufur-e-shauq ki majburiyan bhi kaisi kaisi hain
kisi ka naam likh likh kar mitate hain ghazal vaale
zamin zarkhez hai ye ‘mir’ ‘ghalib’ aur ‘momin’ ki
ki jis men fasl-e-taza ab ugate hain ghazal vaale
ba-ijz-e-ilm-o-danish jaao un ki bazm men ‘tarzi’
ghazal ki sher-bandi par bulate hain ghazal vaale
Leave a Reply