hava-e-ishq men shamil havas ki lu hi rahi
baḌha bhi rabt to be-rabt guftugu hi rahi
na aa.i haath men titli-gudaz ḳhushbu ki
gul-e-badan ki mahak mere char-su hi rahi
vo dasht dasht si ankhen chaman chaman chehra
sarab-e-ḳhauf ki ik lahr ru-ba-ru hi rahi
tulua ufuq pe hai ab tak vahi sitara-e-bad
main bhuul ja.un use dil men aarzu hi rahi
hazar baar luTa husn-e-barg-o-bar magar
rag-e-shajar men ravan mauj-e-rang-o-bu hi rahi
hari ruton ki hui asman se barish
magar zamin-e-tamanna lahu hi rahi
safar ki dhuup ne tan-man jala diya mera
madar-e-dasht men saa.e ki justuju hi rahi
hua na duur mire dil se zang-e-mahrumi
tamam raat ravan chashm-e-ab-ju hi rahi
abad abad se miri ḳhud se jang jaari hai
ye ḳhair-o-shar ki bala mujh se du-badu hi rahi
ubalta rahta hai siine men karb ka laava
libas-e-ḳhak ko bhi hajat-e-rafu hi rahi
tavaf-e-shahr-e-nigaran mira hi jurm nahin
zan-e-hava bhi to avara ku-ba-ku hi rahi
Leave a Reply